Inguqu yokwenyani embhoxweni

Kwenzeke inguqu yokwenyani embhoxweni waseMzantsi Afrika ekuqaleni kwale veki ngethuba umqeqeshi omtsha weSpringbok, uRassie Erasmus, etyumba uSiya Kolisi njengoKapteni weqela lesizwe kwimidlalo yovavanyo noPieter du Toit oza kukhokela kumdlalo ongempelaveki.

Esi sigqibo esingelulanga esithathwe nguRassie omaziyo ncakasana uKolisi kwakwiintsuku zakhe zobutsha embhoxweni phambi kokumthatha eMpuma Koloni emsa eNtshona Koloni – apho ngoku adlalela khona iStormers edlala kwiSuper Rugby.

USiya Kolisi, 26, ngumdlali wokuqala omnyama onikwe uxanduva lokukhokela iqela lesizwe kwimidlalo yovavanyo. AmaBhokobhoko amanxadanxada enkampini – apho alungiselela umdlalo wovavanyo adibana kuwo neWales kwisixeko saseWashington DC, eMelika, ngoMgqibelo.

Ukuchongwa kwendodana yaseZwide, eBhayi, kuyifunqule kwakhona iMpuma Koloni njengendawo enembali etyebileyo embhoxweni ekwavelisa oorhasatsha babadlali.

URassie ubhengeze iqela labadlali abangamashumi amane anesithathu njengokuba iBoks ilungiselela ukudlala naMangesi. Kwinani elichongiweyo, kukho ishumi elinethoba lonke labadlali abamnyama.

Eli lelona nani eliphezulu labadlali abamnyama ababandakanywe kwiqela lesizwe. Abantu belizwe bakuvuyele kakhulu ukuchongwa kukaKolisi, nomphathiswa wezemidlalo, uTokozile Xasa, uliqhwabele izandla inyathelo elithathwe nguRassie.

“Ukuchongwa kukaSiya Kolisi njengoKapteni kuhambelana ncakasana nenkqubo yenquku esiyiphetheyo sililizwe,” utshilo uXasa.

Iqela likaRassie Erasmus ngumxube wabadlali abadala nabatsha. Umqeqeshi uthe uqinisekile okokuba uKolisi noDu Toit baza kwenza umsebenzi omhle kwiBoks.

“Liwonga elikhulu ukuba nguKapteni weSpringboks. Ndichonge uSiya noPieter-Steph ngoba bangabadlali abanyanisekileyo, abazinikelayo emsebenzini kwaye bayahlonitshwa embhoxweni. Ndikholelwa kwelokuba umdlali ngamnye kufuneka alwazi uxanduva lwakhe kwaye kufuneka kusetyenzwe ngobambiswano ukuze iqela liphumelele,” utshilo uRassie.

Forwards: Nizaam Carr, Dan du Preez, Pieter-Steph du Toit (Kapteni), Thomas du Toit, Jason Jenkins, Steven Kitshoff, Wilco Louw, Frans Malherbe, Bongi Mbonambi, Oupa Mohoje, Ox Nche, Sikhumbuzo Notshe, Marvin Orie, Chiliboy Ralepelle, Kwagga Smith, Akker van der Merwe.

Backs: Curwin Bosch, Andre Esterhuizen, Warrick Galant, Travis Ismael, Elton Jantjies, Jesse Kriel, Makazole Mapimpi, Embrose Papier, Ivan van Zyl, Cameron Wright.