Isecicini lokuthotyiselwa iChippa United

Iqela lebhola ekhatywayo leMpuma Koloni elidlala kwi-Absa Premiership, iChippa United, lisecicini lokuthotyiselwa emva kokubethwa ngo’1-0 yiHighlands Park kumdlalo obuseMakhulong Stadium kobu busuku banamhlanje. Umdlalo uqale emva kwexesha ebelibekiwe ngenxa yokucima kwezibane ebaleni kwisithuba esingaphantsi kweyure phambi kwexesha lokuqala komdlalo.

Kuye kwanyanzeleka umdlalo uqhubele phambili phantsi kwaloo ngqele ibiqhaqhazelisa amazinyo nentshizane yemvula kwilokishi yaseTembisa. Isiqingatha sokuqala somdlalo siphele kungekho gowuli ebhodini nangona iChippa United ibiwulawula umdlalo futhi likhona ibathwana lamathuba. Abadlali beChilli Boys abakwazanga ukuyicishilela iHighlands Park ebisenza iimpazamo ezincinci phaya emva. UMbuyiselo Sambu, umqeqeshi olibambela, ubophe uRhulani Manzini phambili obekade onzakele. Akukho bhola ecacileyo okanye mathuba avelileyo kakuhle ebenowasebenzisa.

Zijikile izinto kwisigaba sesibini ngoba yiHighlands eye yafumana amandla okuhlasela. Impazamo eyenziwe nguJustice Tshabalala yokuwisa uLedwaba phakathi ebhokisini yiyo ekhokelele kwigowuli elifakwe nguCollins Mbesuma ngomzuzu wamashumi amathandathu anesithathu. Idlale phantsi koxinizelelo olumandla iChippa United emva koko kwaye neenguqu ezenzileyo aziyincedanga konke konke.

Emva kwalo mdlalo, iHighlands ihleli kwindawo yeshumi elinesine – yona iChippa ikwindawo yeshumi elinesihlanu. Yimidlalo emibini eshiyekileyo nenokuthi iyisebenzise ukuze isinde ezembeni.

Highlands Park: Heugh, Mvala, Sibande, Oluwafemi, Nlapho, Theron, Ngalo, Moriri (Ledwaba 54′), Thabotha, Shalulile, Mbesuma.

Chippa United: Akpeyi, Mako, Thopola, Chabalala, Mvelase, Wambi, Zuke, Sekome (Zulu 75′), Mbenyane (C), Mncube, R. Manzini.