Emva kwesithuba esingaphaya kweenyanga ezimbini, imfazwe ephakathi kweCape Town City neKaizer Chiefs iza kuqala apho ibiyeke khona xa la maqela mabini ethathana emdlalweni weTelkom Knockout ekulindeleke utshise eCape Town Stadium.
Amakhwenkwe kaBenni McCarthy aza kube ekhangela indlela yokufumana impindezelo emva kokubethwa yiChiefs ngo’2-1 emdlalweni wePSL kwiinyanga ezidlulileyo xa edlala neChiefs ngentsimbi yesithathu emalanga ngoMgqibelo.
Izinto azikayihambeli kakuhle iCity kule isizini.
Kunokwenzeka iCity isebenzise imidlalo yeTelkom njengendlela yokubuyisa isidima sayo ebholeni yaseMzantsi Afrika.
Kanti kwelawo icala Amakhosi aya eKapa enyathelela phezulu emva kokubetha iMamelodi Sundowns ngo’4-2 kwiShell Helix Ultra Cup ebibanjelwe eFNB Stadium kwiveki ephelileyo.
Kwisizini edlulileyo, iCity ikwazile ukufumana indebe yeMTN ephunyelelwe yiSuperSport United kule sizini. IChiefs isabhuqwa yindlala yeminyaka engaphaya kwesine.
Unozinti weChiefs, uDaniel Akpeyi, uvakalise umnqweno wakhe wokuphumelela indebe kwisizini yakhe yesibini eNaturena.
Amakhosi aqhuba kakuhle kwaye athe ngcu phezulu kumanqwanqwa ePSL. Nakubeni ebethwe ngo’2-0 yiBloemfontein Celtic kwiveki ephelileyo kodwa akulindelekanga ikuqhokre ukuzithemba kwabadlali beChiefs lo nto phambi komdlalo weTelkom Cup.
“Sinexesha elide sizingela indebe. Into esiyifunayo kukuphumelela, sifuna ukuqala ngeTelkom Cup.
Ibalulekile kuthi lo nto ngokuba yeyona nto eza kusinika amandla.
Kufuneka kubekho into esiyifumanayo kule sizini,” utshilo uAkpeyi ethetha emsithweni ekuphehlelelwe kuwo isiqendu esitsha seTelkom Knockout.
Ifolosi yeCitizens uSiphelele Mthembu uthe iqela lakhe liza kuziphatha zonke izikrweqe elinazo xa lisamkela iChiefs.
Intetho yakhe uShaka Zulu ibonisile okokuba kukho ukugxeleshana ngezikhondo zamehlo phakathi kwala maqela mabini.
“Siza kuzikhupha zonke izikhali zethu xa sisiya emfazweni. Lo nto andiyithethi kuba ndandidlalela iChiefs.
Andiyithiyanga iChiefs ngokuba ndakwenza okulingene mna ndisengumdlali wayo. Kufike ixesha lokuba sinyuse umxakatho nathi. Andiboni ngxaki ekuthelekisweni neChiefs ngokuba siyayazi indlela edlala ngayo.
Sinethuba elide singasaphumeleli. Sinethemba lokuguqula izinto emdlalweni weTKO,” utshilo uMthembu.
Imidlalo yeTelkom Knockout
Lwesihlanu: Maritzburg United vs Bidvest Wits @Harry Gwala Stadium, 20:00
Mgqibelo: Cape Town City vs Kaizer Chiefs @Cape Town Stadium, 15:00; Golden Arrows vs Polokwane City @Sugar Ray Xulu Stadium, 15:00; Orlando Pirates vs Stellenbosch @Orlando Stadium, 18:00; SuperSport United vs Baroka FC @Lucas Moripe Stadium, 20:15.
Cawe: Highlands Park vs Black Leopards @Makhulong Stadium, 15:00; Mamelodi Sundowns @Lucas Moripe Stadium, 15:00
Lwesibini: Chippa United vs Bloemfontein Celtic @Sisa Dukashe Stadium, 19:30
Meta AI, wamkelekile kwikhaya lethu lesiXhosa!