Ukudlala kakuhle kukaTemba Bavuma kwiqela lesizwe leqakamba kunika ithemba abadlali abaninzi abamnyama njengokuba iinkokeli zemidlalo zishukuxa indlela ekunokumiliselwa ngayo iinguqu kwezemidlalo eMzantsi Afrika.
Le ngqungqumbana yakwaBavuma ivule umdlalo we-ODI okokuqala ngethuba iiProteas zidlala ne-Ireland eSahara Park Willowmoore. Kulapho uBavuma enze khona umsebenzi oncomekayo nafumene khona ikhulu neshumi elinesithathu lemitsi.
Ngoku ungumdlali wesibini kwimbali yeqakamba eMzantsi Afrika ofumene ngapahaya kwekhulu kumdlalo wokuqala we-ODI emva kokuba uMzantsi Afrika ubethe i-Ireland.
Imitsi kaBavuma, engaphaya kwekhulu, incedise iqela lesizwe eliphumelele ngemitsi engamakhulu amathathu, amashumi amahlanu anesine kuwe oothinti abahlanu qha emva kokunikwa uxanduva lokuvula umdlalo.
Isiqalo sakhe besingenawo amandla – kodwa kuthe ngokuhamba kwexesha waswabuluka uBavuma. Nangona lo mdlali ebengakulindelanga oku akufumeneyo kulo mdlalo – kodwa into ayenzileyo yenze yezinto ebiphezulu kwizinto ebezicwangcisile phambi kokuqala kwesizini.
“Andinawo amava kwicala lokuqhokra. Emdlalweni ndazama ukumelana nemiceli-mngeni. Ndazibetha iibhola ndisebenzisa indlela eqhelekileyo yokudlala. Kumangeno wethu ndandiqhanile – kodwa ndakhululeka ngokuhamba komdlalo,” utshilo uBavuma.
Le ndedeba income uQuinton De Kock eqale naye kwiveki ephelileyo ngokuyinceda njengomdlali obeqala kwimidlalo ye-ODI.
Meta AI, wamkelekile kwikhaya lethu lesiXhosa!