Imbethi manqindi yaseZiphunzane, uAzinga Fuzile, uhlaze igqala emanqindini uMalcom Klassen kumlo obujongwe ngamehlo abomvu e-we-IBF Afrika ngenjikalanga yayizolo e-Orient Threatre. Ziwuqale ngesantya esiphezulu zombini iimbethi manqindi umlo; uKlassen ubethe uFuzile kabuhlungu entloko – kodwa khange linyakaza igatyana laseZiphunzane. UKlassen uphinde wazama ukuhlasela kodwa onke amanqindi wakhe ebesitsho emoyeni. Udibene nenqindi ebusweni elimlahle phantsi kumzuzu wesibini kumjikelo wokuqala.
Uphinde wazama ukuvuthuza nakowesibini omfana waseToekomrus, kodwa amanqindi wakhe engafumani ndawo yokuhlala. UFuzile uphinde wambeka phantsi uKlassen obebonakala engazazi nokuba ulinxele ngenxa yokungafiki kwamanqindi wakhe kuFuzile. Kowesithathu umjikelo uwe kakubi uKlassen wanendawo engafuni kuphakama, kodwa umqeqeshi wakhe uBernie Perlman uye wamkhuthaza. Kumjikelo wesine ibe liqindi nje elinye eliphumileyo lahlala emehlweni kaKlassen wanikezela.
Komnye umlo; uSiphosethu Mvula udlale ntanganye noPrince Dlomo. UPhila Mpontshane uyikhusele ngempumelelo intshinga yoMzantsi Afrika kumlo alwe kuwo noAnthon Moloisane. Yena uFikile Mlonyeni ugoduke nentsinga ye-IBF Afrika emva kokubetha uXolisile Voyi wanqandelwa ngusompempe uLulama Mtya kumjikelo wesine. USivenathi Nontshinga uphume exwaye intsinga ye-ABU emva kokubetha uTisetso Modisadife kumjikelo wethoba. ULerato Dlamini uyisebenzele intshinga ye-WBO Afrika xeshikweni ebetha uHaidari Mchanjo ngamanqaku. ULuyanda Ntwana ubethwe nguMorabedi Khotle kumjikelo wesibini wacithwa umlo.
UMudau noLorch baweze iDowns emdlalweni weNedbank Cup!