Ingqonyela yezombhoxo kwiSouth African Rugby, uRassie Erasmus, iza kuthawuziswa emalahleni ngumbutho olawula umdlalo wombhoxo kwihlabathi, iWorld Rugby, ombeke ityala lokungaziphathi kakuhle. Oku kulandela iintetha ezenziwe nguErasmus ngosompempe ekuthiwa nguNic Berry obephethe umdlalo wokuqala wovavanyo obuphakathi koMzantsi Afrika neBritish & Irish Lions kwiveki engaphaya kwephelileyo. UBerry wase-Autralia ugxekwe kakhulu ngabalandeli bombhoxo eMzantsi Afrika abamtyhole ngokucishilela iqela labo. Isono sikaRassie Erasmus ibe kukubona iziphene nokugxeka indlela ebewuphethe ngayo umdlalo uBerry kwintetho eshicilelweyo ethutyeleziswe kumajelo eendaba.
Okuthethwe nguErasmus khange kungene kakuhle kumqeqeshi wamaNgesi, uWarren Gatland, ongakhange akuginye ukuchongwa kukaMarius Jonker waseMzantsi Afrika njengosompempe womdlalo wesibini AmaBhokobhoko abethe kuwo amaNgesi ngo’27-9 eCape Town Stadium kwiveki ephelileyo. “Oosompempe ziintsika zemidlalo kwaye ngaphandle kwabo, imidlalo ngeke ibekhona,” itshilo ingxelo ekhutshwe yiWorld Rugby engakuthandanga ukugxekwa kukasompempe wase-Australia. “Emva kokuqwalasela ulwazi, iWorld Rugby ayonwabanga yindlela abantu bamaqela omabini abathethe ngayo ngomsebenzi woosompempe,” itshilo ingxelo.
Phambi komdlalo wesibini kwiveki ephelileyo, uRassie Erasmus ubhence elubala zonke iziphene ezenziwe ngabaphathi bomdlalo ophunyelelwe yiBritish & Irish Lions ngo’22-17. Umbutho olawula umbhoxo e-Australia uyichaze into eyenziwe nguRassie njengohlaselo watsho usithi into ayenzileyo ayamkelekanga. Konke oku kwenzeka abantu abaninzi besathetha ngoRassie ozenza usiputsu onika abadlali amanzi emidlalweni abe egqithisa imiyalezo ebadlalini endaweni yokuhlala ngaphandle kwebala. Yona iSouth African Rugby ithe iza kuziphendula izityholo ezibekwe kuRassie ngexesha elifanelekileyo. Ngempelaveki, uMzantsi Afrika neBritish & Irish Lions ziza kudlala umdlalo wokugqibela wovavanyo.
‘MayingabingooNopopi ooCeba, mabasebenze ekuhlaleni njengoko bonyulelwe oko’