UTinkler ucacisa isigqibo sokushiya iCape Town City

Abalandeli bebhola bothuke baphants’ ukuwa ngethuba besiva iindaba ezithi uumqeqeshi weCape Town City uyahambile emva komsebenzi omhle awenzileyo kwisizini ephelileyo. Namhlanje ekuseni, kuvakele iindaba ezithi ngokwenene u-Eric Tinkler ugqibe kwelokuba ayishiye iCape Town City emva kwesizini enye.

Emalanga namhlanje, igqonyela yeSuperSport United, uStan Matthews, ubhengeze uTinkler njengomqeqeshi omtsha weqela lakhe. UTinkler ungena endaweni kaStuart Baxter oxhakamfule ithuba lokuqeqesha iBafana Bafana kwinyanga ephelileyo. Akukho bani obecinga ukuba uTinkler angathatha isigqibo esinje emva kokunceda iCitizens efumene iTelkom Cup yavala nesizini ikwindawo yesithathu kwiPSL kwisizini yayo yokuqala.

Usihlalo weCape Town City, uJohn Comitis, kuthiwa ushiyeke esi sihwayimbana futhi ekhala ngokulokonywa nguTinkler obezimisele ukumgcina njengomqeqeshi weqela lakhe. Khange achithe xesha uTinkler, kwangoko ucacisile ukuba kutheni le nto ethathe isigqibo esinje. “Emva kweentsuku ezimbalwa ndicinga, kuye kwacaca mhlophe kum ukuba eli qela (SuperSport United) lelona lindifaneleyo. Ukuba uyajonga, uPitso (Mosimane) uqale apha. Simbonile ukuba into ayiyo ngoku. UGavin Hunt ngomnye umzekelo womntu osuka apha,” utshilo uTinkler.

“Khange kundisokolise ukuza kwiSuperSport ngoba liqela elineenjongo eziphakamileyo – baphumelele iindebe zePSL kaninzi. Ndatsho kwangaphambili ukuba ndingumntu ofuna ukukhula. Ndifuna ukuphumelela iindebe mna kwaye ndifuna ukuzibona ndisenza lo nto ke,” uvale ngaloo mazwi uTinkler.

Ethetha neentatheli, uMatthews uthe ngeke kubekho ngxaki kwesi sivumelwano ngoba senziwe ngomoya omhle.

“Eyethu into ithe ngqo kunaleyo kaLuc Eymael (umqeqeshi wePolokwane obenuna ukuqeqesha iBloem Celtic – kodwa othe wathintelwa). Emva kokugqitywa komba wokuya kukaStuart Baxter kwiqela lesizwe, siye sanentlanganiso nosihlalo nebhodi elawulayo – apho sathetha ngamagama wabaqeqeshi onokuza apha. Igama likaTinkler laliphakathi kwaloo magama,” utshilo uMetthews.

UTinkler uza kwiSuperSport emva komsebenzi oncomekayo awenze kwiCitizens ayiqale ekuqaleni emva kokuba uComitis wathenga iMpumalanga Black Aces kunyaka ophelileyo.