Iqhawe leBidvest Wits, uVincent Pule nomqeqeshi wakhe uGavin Hunt, banethemba lokuba impumelelo ezuzwe liqela labo izakuthi ibenefuthe elihle kwimidlalo ye-Absa Premier Soccer League ezayo.
La madoda akuthethe oku emva kokuba iWits ibethe iBloemfontein Celtic ngo’1-0 kumdlalo wokugqibela weTelkom Knockout obubanjelwe ePrincess Magogo Stadium kwiveki ephelileyo.
Umdlali oqinisekise ukuba iWits izuza indebe yesithathu kwisithuba nje esingaphantsi kweminyaka emibini nguVincent Pule – ongene njengelalela kwisiqingatha sesibini somdlalo.
UPule, 25, ngomnye wabadlali abanekamva eliqaqambileyo kwibhola ekhatywayo eMzantsi Afrika.
Igowuli alifakileyo kwiTelkom limbhencile ngokwenene ukuba lo kaPule ungumdlali okhulileyo futhi ekunokuthenjelwa kuye kwimidlalo ebalulekileyo.
Emva kokufumana indebe yeTelkom, lo mdlali ucinga ukuba izinto zingatshintsha kwimidlalo yePSL njengokuba iWits isajubalaza emsileni.
“Umqeqeshi uthe mandihlale emva kuka-Amr Gamal obedlala phambili yedwa. Sidlale kakuhle emdlalweni kwaye nomsebenzi siwenzile. Ndicinga ukuba impumelelo esiyifumeneyo iza notshitsho kule sizini emva kokungaqhubi kakuhle kwimidlalo yethu,” utshilo uPule.
UHunt uphumelele iindebe ezintathu ngoku kwiWits – kodwa usenomsebenzi onzima ngoba iqela lakhe lisemsileni kwiPSL.
Ngoku uziphumelele zonke iindebe ezidlalelwayo ngamaqela adlala kwiPSL. Iqela eliziintshatsheli zePSL liye libe phakathi kwamaqela alwela isithsaba kwisizini elandelayo – kodwa okwangoku akunjalo kwiWits.
Oko kuqale le sizini izinto aziyihambeli kakuhle – kodwa akukonakali kakhulu ngoba amaqela aphambili akakudanga kakhulu kuyo.
“Impumelelo yeTKO izakutshintsha izinto ukuya phambili. Siphumelele imidlalo emine kwiTelkom, ukuba besiphumelele eyePSL, ngesiphaya phezulu ngoku. Iyaxaka into eyenzeka kule sizini,” utshilo uHunt.
Lo mqeqeshi weWits ucinga iqela lakhe lisenalo ithuba lokuwuvala umsantsa ophakathi kwalo namaqela ahamba phambili ngamanqaku aphaya kwishumi.
Ukuzama kwimidlalo yeCaf kwakhona yenye yezinto ayijongileyo uHunt kunyaka ozayo.
URonwen Williams ucelela inkxaso yabalandeli beChiefs nePirates!