UMphathiswa weSebe loHlaliso loLuntu uNomaindia Mfeketo ukhuthaze amakhosikazi ukuba afinyeze umbhinqo, azimilisele zitshone iinzipho kwishishini lezokwakha.
Ethetha eICC eMonti ngoLwesine, kwindibano yamakhosikazi aphantsi kweshishini lezokwakha, uMfeketo uthi urhulumente uneenkqubo azibekele bucala ukuncedisa amakhosikazi akwishishini lezokwakha, watsho esithi umqela ushiyeke kuwo kanye amakhosikazi ukuba athabathe indawo kweli shishini ligutyungelwe ngamadoda.
UMfeketo uthi isebe lakhe laphumeza umthetho othi umyinge wamashumi amathathu ekhulwini (30%), kwisabelo semali yesebe ngonyaka, mawuye kwiinkquleqhu zamakhosikazi akwishishini lokwakhiwa kwezindlu.
UMfeketo uthi isebe lakhe lingayinyusa le mali yabelwa oomama, ukuba nje amakhosikazi angabonakalisa umdla ongaphaya kwishishini lezokwakha, ekwenza oko ngokulandela imithetho emiliselweyo kwezokwakha.
Indibano yaseMonti, ephela ngoLwesihlanu, ibizinyaswe ngamakhosikazi akwishishini lezokwakha aphuma mbombo zone zoMzantsi Afrika.
Kule ndibano, uDolly Mkhatha waseGqebera eBhayi uxelele abasemagunyeni ukuba bengamakhosikazi aseGqebera banezakhono zokwakha, kodwa ingxaki yimali.
Ephendula koku, uMlawuli Jikelele weSebe loHlaliso loLuntu kuzwelonke uMbulelo Tshangana, uthi baza kuwuqwalasela lo mba waseGqebera wokunqongophala kwemali, abe amakhosikazi endawo efuna ukwakha izindlu.
UTshangana uthi iNelson Mandela Bay yenye yeendawo ezihamba emva ngokombandela wokwakhiwa kwezindlu, ilandelwa yiBuffaloCity logama iAlfred Nzo iqhuba kakuhle ekwakheni izindlu.
Meta AI, wamkelekile kwikhaya lethu lesiXhosa!