IKUMKANI yamaXhosa uMpendulo Zwelonke Sigcawu ibhiyoza nesizwe sayo ukugqiba iminyaka engamashumi amahlanu, futhi ke izicelo zokwandisa inani labafazi komkhulu eNqadu azichaswanga.
Kwiveki ephelileyo, unyana kaKumkani Xolilizwe Sigcawu ebebhiyoza noosomashishini kwakunye nabezopolitiko egqiba isiqingatha sekhulu leminyaka kumsitho obubanjelwe kwihotele iRegent eMonti.
Le kumkani yalibona ilanga ngomhla wesine kuTshazimpuzi ka1968.
Umba wokuba uKumkani makandise inani labafazi bakhe uqale njengesiqhulo esisuka kuAce Ncobo, usomashishini kwanomhlalutyi kwimiba yebhola ekhatywayo ongummi waseNqadu.
“Ndikhula phambi kukaKumkani Xolilizwe, ongutata wale Kumkani, owayenabafazi abahlanu. Noko sukude wogqithwe lela xhego (Xolilizwe), endaweni yoko banyuse baye kwisithandathu,” uqhule watsho uNcobo.
Ephendula kwesi siqhulo, uKumkani uthe unabafazi ababini kuphela, watsho esithi akakuchasanga ukwandisa eli nani.
“Ndiza kuyenza le nto ithethwa nguAce, ndibandise abafazi bakomkhulu. Nabafazi bam ababini bayayazi lo nto,” utshilo uKumkani ehleka.
Abafazi beKumkani nguKumkanikazi Sive Sigcawu kwakunye noKumkanikazi Simanye Sigcawu. Bebekhona ngethuba le Kumkani ibibhiyozela ukugqiba iminyaka engamashumi amahlanu kwihotele iRegent eMonti kwiveki ephelileyo.
UKumkani ubophe ngelithi “izicelo” zabo banqwenela ukulandisa inani labafazi bakomkhulu zivuliwe.
Ngomhla wamashumi amabini anesibhozo kule nyanga, le Kumkani izakube iqhuba nemibhiyozo yokuzalwa kwayo eNqadu apho kulindeleke ukuba kubhengezwe ngokusesikweni amaphulo ajolise kuphuhliso loluntu.
Yimali engaphaya kwesigidi seerandi esele iqinisekisiwe njengaleyo iphantsi kwetasi kaKumkani, nejolise ekuphuhliseni isizwe esikhokelwe ngulo mzukulwana kaKumkani Zwelidumile Sigcawu.
Ezinye zezinto esele ziqinisekisiwe, kukuqokelelwa kwezihlangu ezikwi-1 200 kwanezitulo zamavili (wheelchairs) ezikwikhulu elinamashumi amabini ananye (121) eziza kunikwa abo bahlelelekileyo, kulo nyaka wemibhiyozo neKumkani.
Ngenyanga yeSilimela, uKumkani negqiza lakhe baza kuya eBhritane, besiya kukwakha ubudlelwane namaqumrhu ela lizwe.
Iphele njalo indlela yeSundowns kwiCAF Champions League!