Umnyhadala wokudumisa nophehlelelo lweencwadi eMonti

IINCWADI ezintathu ezibhalwe nguPastor Gugu Mbuku kulindeleke ziphehlelelwe ngokusesikweni eMonti kule mpelaveki.

Kwezi ncwadi, ezimbini kuzo zibalisa ngonqulo lobuKristu, ze enye icubungule izifundo ezingeLizwi.

UMbuku ukhuphe iincwadi ezimbini ezithi Psalm Life: When The Heart Meets The Art enye ithi 30 Day Daily Devotional.

“Ngethuba ndiyikhupha kunyaka ophelileyo ndandiceba ukuyiphehlelela kwangoko, kodwa ndabuya ndahlehla,” kutsho uMbuku.

Uthi wagqiba kwelokuwumisa umsitho wokuyiphehlelela de abe ugqiba isiqendu esilandelayo sale ncwadi (Psalm Life).

“Omnye umbono bendihleli ndinawo kukubamba inkomfa yonqulo eMonti nakumazwe angaphaya komda ukuze ndifundise ngonqulo.”

UMbuku uthi uye wasindleka inkomfa yokuqala ebizwa Psalm Life Worship Summit eKampala eUganda. Uthi ingqungquthela yesibini elolu hlobo kulindeleke isingathwe kule nyanga.

“Ndikhethe ukudibanisa ulwaziso lwencwadi ngokusesikweni, inkomfa nomnyhadala kumsitho omnye. Konke oku kwenzeka kule mpelaveki,” kutsho uMbuku encokolela I’solezwe lesiXhosa.

Uthi unezicwangciso zokwenza lo msitho rhoqo ngeveki yesibini kweyoMsintsi nyaka nonyaka.

“Kulo nyaka sakubamba umnyhadala nophehlelelo lwencwadi kuphela, ngaphandle komnyhadala, kodwa ukususela ku2020, sakubamba isiganeko esintsukumbini sineeklasi nocweyo lwezinto ezohlukeneyo ezifana nomculo, umdaniso, ulwazi ngebhayibhile, ukusebenzisa isiphiwo sakho njalo njalo,” kubalisa uMbuku.

UPs Mbuku uzalelwe kusapho oludume ngengoma. Eseminyaka isithoba ubudala, waqala ukudlala ipiyano ecaweni iNorbeg (Norwood Brethren Evangelical Group) eyayikhokelwa ngabazali bakhe – nawashicilela amacwecwe amabini apho.

Ukususela ngoko uye wasebenza namagqala omculo wegospile afana noBishop Benjamin Dube, Pastor Mthunzi Namba, Ntokozo Mbambo, Swazi Dlamini, Joyous Celebration nabanye abaliqela.

UMbuku, umyeni notata wabantwana ababini, ukhe wasebenza njengeMusical Director kwinkqubo yeSABC 2 ethi I want to sing Gospel. Ekwayinkokheli yebandla awazisungulela lona ngo2013 elibizwa iWord & Worship Life Centre.

IPsalm Life Worship Festival ingoMgqibelo umhla we7 kweyoMsintsi, eOrient Theatre ngentsimbi yesihlanu malanga.

UNqubeko Mbatha, Unathi Mzekeli, Sibu Mbuku, Putuma Tiso, Ntokozo Mbatha, Lusanda Beja, Mnqobi Nxumalo, Simthembile Nkunzi, Siphokazi Sondishe noHle Ntombela-Mthethwa – baza kube behlangene eqongeni betshintshiselana ngengoma.

Amatikiti aseComputicket ngeR250.