Zisengxakini izikhululo zasekuhlaleni eMzantsi Afrika

Zizikhululo zasekuhlaleni ezingaphezu kwamashumi asixhenxe ezisengxakini yokungakwazi kubhatala inkampani edidiyela amaza osasazo iSentech.

Ingxelo ithi ezi zikhululo zityala uSentech imali eqikelelwa kumashumi amathathu ezigidi zeerandi (R33 million).

Uninzi lwezikhululo zasekuhlaleni kweli ziphantsi kombutho iNational Community Radio Forum ezinze eParktown eRawutini. 

Ilungu lale bhodi uXola Nozewu uthi zikho iinzame abazenzayo ukuzama ukuthethelela ezi zikhululo.  ”Ezilishumi elinesihlanu zazo sele zivaliwe ngenxa yokuba zingakwazi kuhlawula le mali kaSentech, kukho intlanganiso engomso phakathi kwethu, Sentech, Media Development and Divesirty Agency noMphathiswa weSebe lezoNxibelelwano uNomvula Mokonyane eRawutini,”  utsho uNozewu. 

Uthi injongo ephambili yabo kukufumana isisombululo kwingxaki ephakathi kweSentech nezi zikhululo.

Ukususela ngonyaka ka1993 uMzantsi Afrika unezikhululo zasekuhlaleni ezilawulwa luluntu ngokugunyaziswa ngumthetho i-ICASA Act.

Othethe egameni lomphathiswa wesebe lezonxibelelwano kuzwelonke uMlimandlela Ndamase, uthi la maziko adlala indima ebalulekileyo kunxibelelwano kweli.

“Unobangela wokungenelela komphathiswa kule ngxaki kukuba la maziko adlala indima ebalulekileyo, enika uluntu ithuba lokuba luthathe inxaxheba kwinkqubo zolawulo lwelizwe,” utsho uNdamase.

Ukanti iMedia Development and Divesirty Agency inoxanduva ngokomgaqosiseko wokuba ixhobise abaphathi nabasebenzi bala maziko ngezakhono kulawulo.

“Singamalungu ebhodi azinze apha eMpuma Koloni siza kuhamba emva kwemini ngoLwesine sisinge kwelaseRawutini ukuze sibe yinxalenye yale ndibano,” utsho uNozewu. 

Ukususela ukusungulwa kwazo ezi zikhululo, inkampani yakwaSentech yeyona isoloko ihamba phambili ukuzinika amaza onxibelelwano nabaphulaphuli bazo.

“Le ntlanganiso kufuneka  isincedise ukufumana isisombululo sexeshana ukuthintela iingxaki zokucinywa kwamaza kwezi zikhululo, isicwangciso sexesha elide iyakuba kukufumana amacebo okophula ulawulo kwezi zikhululo zibaluleke kangaka,” utsho uNdamase.

Uhambisa athi bengurhulumente bazimisele ukuqinisekisa ukuba ezi zikhululo ziyaqhubeka ukunika uluntu loMzantsi Afrika ulwazi, ithuba lokuvakalisa izimvo zalo namanye amalungelo.