Imvumi yaseLibode icula ingoma ngoPitso Mosimane

IMVUMI yeKwaito naMapiyano, uMshampisto, ikhuphe ingoma etyibela umqeqeshi weqela lebhol’ ekhatywayo uPitso Mosimane.

UMshampisto, ogama lokuzalwa inguMziwethemba Mgilazana, uthi ukhethe ukuncoma lo mqeqeshi ngegalelo lakhe nangendlela azimisele ngayo kumdlalo webhola ekhatywayo.

Ingoma kaMshampisto, 34, inzalelwane yaseZandukwana, eLibode, sele ikhona kwiivenkile zonxibelelwano lweintanethi.

“UPitso Mosimane yingoma enika imbeko kumqeqeshi weSundowns uMosimane ngakwenzileyo kwibhola yoMzantsi Afrika kuquka nokuphumelela iChampions League kwiMamelodi Sundowns ngo2016, yiyo loo nto ndikhethe ukucula ngaye,” uMshampisto ubalisela I’solezwe LesiXhosa.

Le mvumi, esele izinze kwelaseRhawutini, ikhe yakhupha iingoma ezifana noUngamyeki, Ungenza Crazy no-Oncam ncem.

UMshampisto usebenze nabantu abafana noDrencko noMadluphuthu. Uthi wabelane ngeqonga neemvumi esingabalula kuzo uPitch Black Afro, Brickz noSpikiri.

Uthi nangona nje ecula ngoMosimane, kodwa akanguye umlandeli weMamelodi Sundowns.

“Ndingumlandeli weOrlando Pirates,” utshilo.

Le mvumi yabhalela uMosimane i-email, imxelela ukuba ikhethe ukumhlonipha ngengoma, uMosimane waphendula ngokubamba ngazibini ngengqwalasela kule mvumi, waze wayinika nesilumkiso.

“Enkosi kakhulu ngokundiqaphela. Ndiziva ndithobekile. Kodwa uze uqaphele, ungayithumeleli omnye umntu le ngoma, hleze ayibe ze ayitshintshe!” kuphendula uMosimane kule mbalelwano.

UMshampisto uthi umculo wakhe ubalisa ngako konke okwenzekayo ebomini.

Ungancokola naye ngokumkroba kumakhasi onxibelelwano afana noFacebook: Mshampisto EyaseKasi, Twitter: @MshampistoK, Instagram: mshampisto_sa

simphiwe.freddie@inl.co.za

1 of 2