Umsebenzi ugqityiwe, ngoku lixesha lokuba kuvuzwe abo bathe baqaqamba ebudeni besizini yePremier Soccer League ka2017/18.
Ekuqaleni kwale veki, iPSL ikhuphe uluhlu lwamagama wabadlali nabaqeqeshi abanethuba lokuwongwa kumsitho ozakube ubanjelwe eGoli ngokuhlwa ngoLwesibini weveki ezayo.
Abadlali beMamelodi Sundowns, umqeqeshi wabo uPitso Mosimane, kulindeleke ukuba bawole amawonga aliqela emva kokuba iqela labo liphumelele eyona ndebe yePSL isihlandlo sesibhozo.
UJingles wenze imbali kweli lizwe ngokuthi abe ngumqeqeshi wokuqala omnyama ophumelele indebe yePSL izihlandlo ezithathu, iNedbank Cup, iTelkom Knockout, iCaf Champions League neSuper Cup.
Kwiveki ezayo, kulindeleke ukuba uPitso azuze iwonga lomqeqeshi wesizini emva kokuphumelela eyona ndebe ibalulekileyo kwibhola yaseMzantsi Afrika.
UFadlu Davids, othathe iMaritzburg United wayisa kumagqibela kankqoyi weNedbank wayibeka kwindawo yesine kwiPSL, ukhuphisana noPitso.
UMilutin Sredojevic weOrlando Pirates uphakathi kwabaqeqeshi abanethuba lokufumana iwonga lomqeqeshi ophambili emva kokubeka iqela lakhe kwindawo yesibini kwisizini ka2016/17.
UPercy Tau kulindeleke agoduke newonga lomdlali wesizini emva kwendima ebonakalayo ayenzileyo kwisizini ephelileyo.
Lo mdlali uncedise kakhulu oogxa bakhe ebaleni kanti uzibonakalisile kwicala lokufaka amagowuli alishumi elinanye abambene ngawo noRodney Ramagalela wePolokwane City.
Kwiwonga lomdlali wesizini, uTau ukhuphisana nesiquququ uHlompho Kekana kunye nomdlali onekamva eliqaqambileyo weMaritzburg – uSiphesihle Ndlovu.
Omnye umdlali odlale kakuhle nonethuba lokuzuza kwiveki ezayo nguMusa Nyatama wePirates. Ukhuphisana noTau noNdlovu kwiwonga ekukhetha kulo abadlali.
UDennis Onyango ukhuphisana noItumeleng Khune noRichard Ofori kwiwonga likanozinti owenza umahluko kwisizini yonke.
Abadlali beDowns kulindeleke ibengabo nomqeqeshi wabo abawola amawonga abalulekileyo kumsitho wePSL kwiveki ezayo emva komsebenzi ophucukileyo abawenzileyo.
Uluhlu lwabagqatswa
Goalkeeper of the Season:
Itumeleng Khune, Richard Ofori, Denis Onyango
Defender of the Season:
Bervan Fransman, Innocent Maela, Siyanda Xulu
Midfielder of the Season:
Siphesihle Ndlovu, Hlompho Kekana, Musa Nyatama
Young Player of the Season:
Sibusiso Mabiliso, Teboho Mokoena, Siphesihle Ndlovu
Player’s Player of the Season:
Siphesihle Ndlovu, Percy Tau, Musa Nyatama
Footballer of the Season:
Hlompho Kekana, Siphesihle Ndlovu, Percy Tau.
‘Siba nexhala xa kuza kunetha imvula’