Amajita azizisulu zenduku kwiFifa World Cup!

Ikamva leqela lesizwe loMzantsi Afrika, Amajita, limfiliba kwiNdebe yeHlabathi edlalelwa kwilizwe lasePoland.

Okucace gca okwekati emhlophe ehlungwini kukuba Amajita azizisulu zenduku qha.

Emva kwemidlalo emibini, uMzantsi Afrika ubethwe kabini kwaye nendlela odlale ngayo ibhola ayincumisi kwaphela. Amajita avuthululwe ngemvula yamagowuli amahlanu kwamabini (5-2) yiArgentina kwiveki ephelileyo.

NgoLwesibini wale veki, Amajita abethwe yiKorea Republic ngo’1-0 emdlalweni obubanjelwe eStadion Miejski. Isiqalo seqela likaThabo Senong khange sincumise ngoba kuye kwanyanzeleka abadlali bavale amazibuko iKorea ifuna ukufaka igowuli kwangoko emdlalweni.

Iinzame ezenziwe nguSiphelele Mkhize noJames Monyane kwisigaba sokuqala zifike unozinti weKorea ethe qwa.

Emva kwekhefu, iKorea ilawule umdlalo yafaka negowuli ebekuphela kwalo emdlalweni.

Ukubethwa koMzantsi Afrika kunciphise ngakumbi amathuba wokugqithela kumjikelo olandelayo kwiFifa Under-20 World Cup yalo nyaka.

Amajita akakwazanga ukudlala umdlalo ocacileyo emdlalweni wale veki. Bekungcono emdlalweni wokuqala ngoba abadlali bakwazi ukugcina kubo ibhola ngamathuba athile.

Ngomso, Amajita adibana nePortugal emdlalweni wokugqibela kaGroup F. USenong uvumile ukuba linzinyelwe iqela lakhe kodwa liza kudlalela ukuphumelela xa lidibana nePortugal ngoLwesihlanu.

“Bendibaxelele abadlali bethu okokuba baza kohlwaywa yiKorea ukuba abawasebenzisi amathuba. Ngoku kufuneka silungiselele ukudlala nePortugal emdlalweni ongazukuba lula. Kunzima kuthi ngoba silahle amanqaku kodwa siza kuzama ukulwela amanqaku apheleleyo emdlalweni wokugqibela,” utshilo uSenong emva komdlalo ePoland.