Imidlalo yeHollywoodbets ibuye ngamandla emva kweWafcon ebikwinyanga ephelileyo eMorocco. Abethene amaqela kwiveki yokuqala kwinyanga yeThupha ade aphumelela kwiveki yesibini ebineholide elusuku loomama eMzantsi Afrika. Emidlalweni esixhenxe edlalwe ngoLwesibini wale veki, asixhenxe amaqela akwazileyo ukuphumelela. Ngelishwa lomhluzi wamanqina, amaqela aseMpuma Koloni akayiphumelelanga imidlalo yawo. Ithunderbirds Ladies ibuye iphaca emva kokubethwa yiMa-Indies Ladies ngegowuli elinye. Kanti iCity Lads ivuthululwe yiBloem Celtic, eyekaMamkhize ngoku, ngemvuyala yamagowuli amathathu eqandeni emdlalweni obuseFree State.
Kweminye imidlalo, iTUT FC ibethele oogqirha nezicaka iGolden Ladies ngamagowili amahlani kwelinye, iJVW FC inkule iTsunami Queens ngamagowuli amane eqandeni, iUJ FC ingombe iFirst Touch FC ngamagowuli amane kwelinye, iUWC FC ibethe iDurban FC ngamane kwamabini. Yona iVasco Da Gama ibethe iCoastal City ngamagowuli amathathu kwelinye. Nakubeni iziphumo ezifunyenwe yiThunderbirds neCity Lads bezingancumisi kwezi veki ezigqithileyo, ngempelaveki aza kufumana elinye ithuba lokuzama ukulwela amanqaku apheleleyo emidlalweni yangempelaveki.
Emva kweshumi elinesihlanu lemidlalo kule sizini, iThunderbirds ihleli kwindawo yesibhozo kwiHollywoodbets Super League emva kokuqokelela amanqaku angamashumi amabini anesibini. Iqela laseGcuwa liza kudibana neGolden Ladies emdlalweni ongoMgqibelo ngentsimbi yesithathu. Akufanelanga isokole iThunderbirds ngoba iGolden Ladies ayikaphumeleli kule sizini. Kanti yona iCity Lads iza kuxikixana ne-UWC FC ngentsimbi yesithathu ngeCawe. Lo ngumdlalo oza kuba nzima ngoba iUWC FC iqhuba kakuhle futhi ihleli kwindawo yesine kwiSuper League. Into ecacisa mhlophe indlela eqhuba ngayo. Lona iqela laseMpuma Koloni, iCity Lads, likwindawo yeshumi elinesine kwaye lisaqokelele ibathwana lamanqaku asibhozo qha.
Imidlalo:
Mgqibelo: Richmond United vs JVW FC, 13:00; UJ FC vs Coal City Wizards, 15:00; TUT FC vs Durban Ladies, 15:00; Tsunami Queens vs First Touch FC, 15:00; Thunderbirds Ladies vs Golden Ladies, 15:00
Cawe: Vasco da Gama vs Bloem Celtic, 11:30; UWC vs City Lads Ladies, 15:00
UCavin Johnson usola usompempe ngokuhlazwa kweChiefs izolo