Amatsatsantsa ziintshatsheli ezivunyiweyo zeMTN 8 ngo-2019!!!

By
Pedro Mapelo
-
Bradley Grobler of Supersport United celebrates goal during the MTN8 2019 Final football match between Highlands Park and SuperSport United at Orlando Stadium on 05 October 2019 ©Gavin Barker/BackpagePix

Amatsatsantsa
a Pitori ziintshatsheli ezintsha ezivunyiweyo zeMTN 8 ngo-2019 emva kokubetha iHighlands Park ngegowuli elinye eqandeni (1-0)
emdlalweni obubanjelwe e-Orlando Stadium ngokuhlwa kwanamhlanje. Eli lityeli
lesithathu iSuperSport United iphakamisa indebe yeMTN 8 embalini yebhola. Igowuli
ephumelele ngalo iSuperSport United lifakwe sisiququ, uBradley Gobler, emva
kokufumana ibhola egotywe ngobuchule ekunene nguTeboho Mokoena emzuzwini
wamashumi amane anesihlanu kwisiqingatha sokuqala. Iqela lika-Owen Da Gama liwuqale
kakuhle umdlalo lihlasela macala onke. UMothibi Mvala ufumene ithuba elihle
lokubhalisa ebhodini emzuzwini wesithathu – kodwa ibhola ifike uRonwen Williams
ethe qwa ezipalini. Khange batyhafe abadlali beHighlands emva kokuphosa elona
thuba elicacileyo emdlalweni. ULindokuhle Mbatha noPeter Shakulile bazamile ukuliqhekeza
udonga lweSuperSport emva – kodwa izinto azibahambelanga kakuhle.

      

Ibuyele emdlalweni
iSuperSport emva kwemizuzu elishumi. UClayton Daniels akakwazanga ukungquba
ibhola ebikhatywe nguSipho Mbule. Emzuzwini wamashumi amabini anesibhozo
kwisigaba sokuqala, uShakulile uzamile kwakhona ukufaka igowuli emnatheni emva
kokufumana ibhola kuMarks Munyai – kodwa ibhola yakhe ibhabhe phezulu. UThamsanqa
Gabuza ngoyena mdlali obe yinkathazo ngoba ibunguye owamkela iibhola aphinde
azityale koogxa bakhe. Ukuchongwa kwakhe njengomdlali oqaqambileyo emdlalweni
weMTN 8 wokugqibela akothusanga. Nangona amaqela omabini ezamile ukudlala
ibhola engcono – kodwa akubangakho nto exhomisa amahlo. UDa Gama ukhalele
amathuba angasetyenziswanga kakuhle ngabadlali bakhe ekuye kwacaca ukuba
baswele amava ekuqaleni komdlalo. Kanti yena uKaitano Tembo uphumelele indebe
yakhe yokuqala njengomqeqeshi.

  

Highlands: Theela Ngobeni, Marks Munyai, Ryan Rae,
Luckyboy Mokoena, Spiwe Msimango, Lesenya Ramoraka, Lindokuhle Mbatha, Mothibi
Mvala, Sphiwe Mahlangu, Mokete Mogaila, Peter Shalulile.

SuperSport: Rowen Williams, Siyabonga Nhlapo, Clayton
Daniels, Grant Kekana, Aubrey Modiba, Evans Rusike, Teboho Mokoena, Dean
Furman, Sipho Mbule, Bradley Grobler, Thamsanqa Gabuza.

RELATED ARTICLESMORE FROM AUTHOR