Iqela lebhola ekhatywayo laseMpuma Koloni, iChippa United, libhengeze utshintshiselwano lwabadlali phakathi kwalo naMaZulu FC ngokuhlwa namhlanje. IChippa yamkele umdlali wasemva osakhulayo u-Ayanda Konqobe, logama wona AmaZulu efumene uRhulani Manzini – ifolosi efake amagowuli aliqela kwisizini edlulileyo. Esi sivumelwano senziwe ngala maqela omabini ngesihle kwaye ababadlali kulindeleke baqale ukusebenza (macala omabini) phambi kokuphela kwale veki. UManzini yenye yeefolosi ezifaka amagowuli kwaye uyibonakalisile lo nto kwisizini egqithileyo ayivale enamagowuli asibhozo kwimidlalo elishumi elinambini.
Usihlalo weChippa, uSiviwe Mpengesi, uzingqinile ezi ndaba kwingxelo ebhaliweyo ekhutshwe namhlanje. “Ndibulela kakhulu uRhulani negalelo lakhe alenzileyo kwiChippa United. Kwisizini edlulileyo ufake amagowuli asibhozo kwimidlalo elishumi nanye kwaye soze siwulibale umdlalo awafaka kuwo amagowuli amathathu sidlala neSuperSport United esasinda ngawo ezembeni. Sivumelene ngalo mdlali naMaZulu kuba sicinga okokuba kuMoeketsi Sekola, uMashego, uLerato Manzini, uMayambela noKurt Lentjies sinabadlali abafaka amagowuli ngokwaneleyo. URhulani ukwamkele ukuya kwakhe kuMaZulu kwaye simnqwenelela okuhle kodwa,” utshilo uMpengesi.
UKonqobe, 21, utyikitywe ngaMaZulu phambi kokuqala kwesizini yePSL eqale kwiveki ephelileyo emva kweengxelo ezazimoyamanisa namaqela aseGoli kwaneChippa United le eza kuyo ngoku. “Siyamamkela uKonqobe thina kwiChippa United Football Club. Asithandabuzi, sityikitye umdlali osemtsha futhi osezingeni eliphezulu,” utshilo uMpengesi.
Kulindeleke uKonqobe akhuphisane nabadlali abafana no-Okwuosa noMacheke emva kokutyikitya isivumelwano sengqesho seminyaka emithathu neeChilli Boys. Eli qela lizinze eBhayi lizakudlala neBaroka FC kwiveki yesibini kwinyanga ezayo emva kokubetha AmaZulu ngo’2-0 kumdlalo wePSL obuseNelson Mandela Bay Stadium ekuqaleni kwale veki.
‘MayingabingooNopopi ooCeba, mabasebenze ekuhlaleni njengoko bonyulelwe oko’