Iqela likaBenni McCarthy liphumelele idabi laseNtshona Koloni

Ifake amanqaku
amathathu engxoweni iCape
Town City
emva kokuba ibethe iStellenbosch ngegowuli elinye eqandeni (1-0) emdlalweni
we-Absa Premiership wobukhaya obubanjelwe e-Athlone Stadium ngorhatya
lanamhlanje. Ibikokokuqala ifumana impumelelo iCape Town City – kanti bona abatshakazi
(Stellenbosch) abakaphumelelo nomnye umdlalo emidlalweni emibini
abayidlalileyo. Ngoku iCity inamanqaku amane ebhodini emva kokudlala ntanganye
emdlalweni wokuvula isizini kwiveki ephelileyo. Umdlalo wanamhlanje utake
iintlantsi ukusukela kumzuzu wokuqala kwisigaba sokuqala. Igowuli leCity
lifakwe nguChristofer David emva kwebhola edlalwe kakuhle nguKermit Erasmus
no-Amethyst Ralani.

Iqela likaBenni
McCarthy liphinde lafumana elinye ithuba – kodwa uKermit Erasmus akakwazanga
ukulisebenzisa ngenxa kanozinti weStellenbosch ophume kwangongo ezipalini
zakhe. Amaqela aye kwixesha lokuphumla iCity inkqenkqeza phambili ngegowuli
elinye. Abatshakazi bePSL, iStellenbosch, bazamile ukufaka uxinizelelo kwiCity kwisigaba
sesibini – kodwa abadlali bayo boyiswe kukusebenzisa amathuba phambi kukaPeter
Leeuwenburgh ezipalini. Umdlali wasesiswini weCity, uGift Links, ngomnye wabadlali
ababedlala iibhola ezintle kwiindawo ezibalulekileyo ebaleni. Nangona iqela
likaSteve Barker libethiwe emdlalweni – kodwa okwakumxolisa kukuba liyakwazi
ukudlala ibhola ebonakalayo noxa kufuneka abadlali bawasebenzise amathuba
avelayo emdlalweni.

Cape Town City: Leeuwenburgh, Mkhize, Cupido,
Edmilson, Seedat, Kewuti, David, Makola, Links, Ralani, Erasmus.

Amalalela: Stephens, Martin,
Nodada, Roberts, Morris, Norodien, Mthembu.

Stellenbosch: De Jong, Robertson,
Van Heerden, Gould, Mthethwa, Bergman, Awono, Zungu, Moroole, Rayners, Skelem.

Amalalela: Mathebela,
Ndlovu, Isaacs, Matsi, Du Preez, Franco, Langeveldt.