UThulani Mbenge uyakhula emanqindini. Kwiveki ephelileyo, le ndodana yaseMdantsane yenze imbali ngokubetha imbethi manqindi yaseMexico engazange yabethwa egama linguDiego Cruz kumlo obukwiholo lembali iEmperor Palace.
UMbenge uye kumlo nendedeba yaseMexico enethemba lokufumana le ntshinga yeWBC kwididi leWelterweight emva kokuba uDiego Cruz engabufumenanga ubunzima obamkelekileyo esikalini.
Le mpumelelo izuzwe nguMbenge imfake kuluhlu lweembethi manqindi zeli lizwe loMzantsi Afrika ezifana noo-Azinga Fuzile nezinye ezineentshinga ezimbini ukuya phezulu (Intshinga yoMzantsi Afrika nentshinga yeWBC International).
UMbenge, 25, ophumelele lo mlo ngamanqaku emva kwemijikelo elishumi elinesibini, ubulele kakhulu umthelekisi wakhe uMnumzana uRodney Berman emva komlo.
“Ndiyabulela kuMnu. Rodney Berman ngokundinika eli thuba. Nakumqeqeshi wam uPeter Smith.” UMbenge uyincomile indlela alwe ngayo uCruz. “Andifuni ukuxoka, yimbethi manqindi elushica uCruz. Ndifunde lukhulu kulo mdlalo. Ndithi enkosi nakubalandeli bam ngokundixhasa,” uvale ngalo mazwi.
UMbenge ebesilwa umlo weshumi elinesithathu njengembethi manqindi ehlawulwayo yaye uyiphumelele yonke loo milo.
Kanti uphulukene nomlo wakhe wesithandathu uDiego Cruz, nobedlala umlo wakhe wamashumi amabini anesithandathu aphumelele elishumi elinezibhozo waze wadlala ntanganye kwemibini.
Ezinye iziphumo zale tumente:
UDeeJay Kriel uyikhusele ngempumelelo intshinga yakhe yeWBC International kudidi lweNgcongolo emva kokubetha intshatsheli yoMzantsi Afrika, uXolisa Magusha, ngamanqaku.
Ibilityeli lesibini enyathelana ngentupha la matyendyana nowokuqala umlo waphunyelelwa kwangulo kaKriel.
UKevin Lerena ubethe uDimytro Kucher wase-Ukraine ngamanqaku eqinisekisa ukuba uyikhusela ngempumelelo intshinga yakhe ye-IBO kudidi leCruserweight.
URowan Campbell ubethe uMasixole Botile wazinqandela kumjikelo wesibini kumlo wodidi lweMiddleweight.
isibhalo@inl.co.za
‘MayingabingooNopopi ooCeba, mabasebenze ekuhlaleni njengoko bonyulelwe oko’