Omnye wabaqeqeshi beMamelodi Sundowns, uRulani Mokwena, umkhusele unozinti weqela lakhe nangona enze iimpazamo ezinkulu emidlalweni emibini ilandelelana. Kwiiveki ezimbini ezigqithileyo, uDenis Onyango wenze iimpazamo iSundowns idlala idabi lobukhaya lasePitoli notshaba lwayo iSuperSport United. Nangona iSundowns yayihamba phambili ngamagowuli amabini emdlalweni, umdlalo waphela ibambene neSuperSport ngo’2-2 emva kweempazamo ezenziwa nguDenis Onyango. Le ndedeba yase-Uganda ibonwa njengonozinti ophambili kwizwekazi le-Afrika yonke emva kokuziqaqambisa kwiSundowns emdilalweni yeDStv Premiership nakwiCAF Champions League.
Kodwa kutshanje wenze iimpazamo eziphantse zayifaka engxakini iSundowns engekabethwa kwisizini eqhubekayo yeDStv Premiership. Emdlalweni obuphakathi kweSundowns neSekhukhune emalanga ngoMgqibelo ogqithileyo, u-Onyango wenze enye impazamo ebangele akhutshwe ngekhadi elibomvu emdlalweni ophele uphunyelelwa yiDowns ngo’2-0. Ngokomgaqo weSundowns, umdlali ofumana amakhadi atyheli nabomvu okanye ongaziphathi kakuhle – uye anikwe isohlwayo. Kwenziwa lo nto liqela kuba lifuna wonke umntu agcine umgangatho wokuziphatha ebaleni nangaphandle uphezulu. UMokwena usikhusele isenzo esenziwe ngunozinti wakhe ngelithi ingxaki ayiqalanga kuye.
“Abantu baza kuthetha ngekhadi elibomvu – kodwa kunokwenzeka ukuba kukho iimpazamo ezisixhenxe ezenziweyo phambi kweyakhe. Ndingatsho ukuba (ngoMgqibelo) bekungekho mfuneko yokuba ibhola ibuyiselwe emva kuMosa Lebusa ocinge ukuba iya kuDenis Onyango. Kodwa ke xa udlalela iSundowns kusoloko kukho uxinizelelo. Impazamo yeyethu sonke ngoba siliqela elinye. Ukuqala ibhola emva yindlela esidlala ngayo kakade,” utshilo uMokwena. IDowns iza kulwela amanye amanqaku amathathu xa idibana neStellenbosch FC emdlalweni weDStv Premiership oza kube useDanie Craven Stadium emalanga ngoMgqibelo.
‘MayingabingooNopopi ooCeba, mabasebenze ekuhlaleni njengoko bonyulelwe oko’