Owayefudula edlalela iKaizer Chiefs, uWillard Katsande, uhambe engawuvali umlomo ngenxa yetalente ayibone eMpuma Koloni. UKatsande ebelindwendwe olihloniphekileyo letumente ekuthiwa yiNozulu Youth Legacy Cup eququnjelwe eWalter Sisulu University, eGcuwa, emalanga ngeCawe edlulileyo. Amaqela asibhozo aphuma kwiindawo ngeendawo eMnquma Municipality ezifana neGcuwa, iNgqamakhwe, uCentane nelinye laseMonti ebelimenyiwe – akhuphisene kwamdaka iisali emidlalweni eqale ngoLwesihlanu yasongwa ngeCawe.
Njengomntu okhe wadlala ibhola kwinqanaba eliphezulu, uKatsande ebemenywe ngumququzeleli wetumente, uLuxolo Matikinca, ukuze ajonge abadlali abanetalente. Ubukho bakhe kuqinise ngamandla umsebenzi omhle owenziwa yiNozulu Legacy Cup eyasungulwa ukuze ivulele abadlali abasakhulayo amathuba okukhulisa izakhono zabo ebholeni ekhatywayo. Enyakeni wesibini, itumente ivelise iYoung Stars United njengeentshatsheli ezintsha. Kwenzeke oko emva kokuba ibethe iCentre of Excellence yaseMonti ngo’3-0 emdlalweni wokugqibela.
“Mandibulele impatho entle endiyinikwe ngabantu balapha. Bendiqala ukuza apha. Ebholeni, italente ikhona apha. Ingase belikhona iqela elidlala kwiPSL. Baninzi abadlali abanetalente abaphuma kule tumente. Ingase italente yabo ingapheleleni emoyeni,” utshilo uKatsande emva kwetumente. “Into endiyithandileyo ebadlalini kukuba bazithembile, badinga ukufumana indawo engaqinisa izakhono zabo. Ndibone abadlali abaneminyaka eyi13 neyi14 bedlala kakuhle kodwa badityaniswe nabadala kubo.
“Okumnandi ngale tumente kukuba inika abadlali abasakhulayo ithuba lokuzibonakalisa. Ndiza kubalisa izinto endizibone apha eMpuma Koloni ndakufika eGoli. Ibhola bayakwazi ukuyidlala, into ekufuneka bayenze kukuzimisela,” uvale ngaloo mazwi uKatsande. Iqela eliphumelele indebe lifumene ishumi lamawaka erandi (R10.000) elikhatshwe yikiti entsha, iibhola nezinye izinto. Yona iCentre of Excellence ihambe namaqaka amahlanu nekiti nezinye izinto.
Namhlanje lusuku lwezinyanya