Zibaliwe iintsuku zomqeqeshi weCape Town City onikwe ikhefu engalicelanga

Iintsuku zikaJan Olde Riekerink, njengomqeqeshi weCape Town City (CTC), zibaliwe. Oku kulandela isigqibo esithathwe liqela sokumnika ikhefu ngesiquphe emva kokuba iCape Town City ibethwe yiTS Galaxy ngegowuli elinye emdlalweni ogqithileyo. Phambi kokubethwa eMbombela Stadium, iCity ibethelwe oogqirha nezicaka ngemvula yamagowuli amahlanu kwelinye (5-1) ngaMaZulu aqeqeshwa nguBennie McCarthy.

URiekerink waqeshwa yiCape Town City phakathi kwisizini egqithileyo, elandela ezinyaweni zikaMcCarthy – owagxothwayo liqela lakhe lokuqala njengomqeqeshi (CTC) ngenxa yeziphumo ezibi.

“Siliqela sifuna ukwazisa ukuba umqeqeshi, uJan Olde Riekerink, unikwe ikhefu. UDiogo Peral, olisekelamqeqeshi, uza kuxhuzula imikhala kude kwenziwe esinye isaziso,” itshilo ingxelo ekutshwe yiCape Town City kwikhasi layo lonxibelelwa, uTwitter, ngoMvulo. Eli qela laseKapa lihleli kwindawo yesixhenxe kwiDStv Premiership emva kokubethwa emidlalweni emibini ilandelelana.

Kwiinyanga ezigqithileyo, iCape Town City ikhe yanethuba elide kakhulu ingakwazi ukuphumelela imidlalo. Kwanyanzeleka umphathi weCity, uJohn Comitis, abangxolise abadlali beqela lakhe zatsho zalunga izinto.

“Abadlali mabanyuse umxakatho. Le nto yenzekayo mayiphele, sitsale ngexhadi elinye,” watsho uComitis, engxolisa abadlali bakhe. Ukubethwa kweCape Town City yiTS Galaxy kukona kummoshele izinto kakhulu umqeqeshi.

Abasemfuthweni wolwazi bathi uRiekerink akazange ayithande konke konke indlela abaziphatha ngayo abadlali bakhe bedlala naMaZulu. Umdlali wasemva, uTaariq Fielies kuthiwa ngoyena mdlali owamcaphukisayo kakhulu umqeqeshi.

Nangona uFielies efunwa ngamaqela amakhulu aseGauteng – kodwa uRiekerink angaqala ahambe kunaye ngoba kukho iingxelo ezithi uComitis uzama ukubuyisa uEric Tinkler. Unethuba elidana uTinkler engasebenzi – kodwa uComitis ufuna abuyele eKapa ngoba ufuna iqela lakhe livale isizini lisendaweni entle.

UTinkler wanceda iCity yaphumelela iTelkom Knockout kwisizini yayo yokuqala. NgoLwesithathu weveki ezayo, iCape Town City iza kudibana neBloemfontein Celtic emdlalweni weDStv Premiership, eDr Molemela Stadium.