Kukhal’ ibhungane erenkini eMonti emva kombhodamo woonoteksi!

KUKHALA ibhungane kwirenki yoonoteksi ngakwaSteers eMonti emva kwengxabano yoonoteksi ekhokelele kumlo ngentseni yangoLwesihlanu, de kwabe kanti kubizwa amapolisa nafike asebenzisa iimbumbulu zerabha ukuzama ukunqanda

Ngethuba I’solezwe lesiXhosa lifika, irenki ibizele amapolisa kwanamagosa ezendlela kuquka negquba loonoteksi.

Njengoko irenki engakwaSteers nangakwaBoxer iqhele ukugcwala inyambalala yabakhweli, bekungekho nomnye umkhweli ngentseni yangoLwesihlanu.

Iingxelo zithi oku kuza emva kokungavisisani koonoteksi, nto leyo ethe yakhokelela ekubeni balwe bambi begxogana ngamatye.

Ozibonele ngawenyama uthi kukho unoteksi odutyulwe emlenzeni ngembumbulu yerabha ze waleqiswa esibhedlele.

Isithethi samapolisa uColonel Sibongile Soci uyingqinile le ngxabano, esithi ngokwengxelo akukho mntu udutyulwe wabhubha.

Iivenkile ezingqonge ezi renki bezivaliwe nanjengoko abanini bebesoyikisela abathengi.