NANGONA sele kusele iiyure ezimbalwa phambi kokuba amaMpondo abeke ngokwesiko lawo iKumkani yesi sizwe uZanozuko Tyelovuyo Sigcau eNdimakude, eSiphaqeni, elinye lamacala aphikisa oku lithi nguNkosi uNzululwazi Sigcau iKumkani yamaMpondo.
Othethe egameni leKomkhulu eliseMatshona eNtabankulu, uNkosazana uStella Sigcau, uthi bawubhudile umhlola abo bathi nguZanozuko iKumkani yamaMpondo.
”Asinanto yokwenza nayo yonke le nto izakwenzeka eNdimakude. IKumkani yamaMpondo nguNzululwazi Sigcau ozalwa nguNtsikayezwe, yena ozalwa nguBotha Sigcau, asijiki,” ugadlele watsho uStella Sigcau.
Uthi uNzululwazi watyunjwa kwindibano yesizwe samaMpondo eyayibanjwe zizindlu zonke zasemaMpondweni ngonyaka ka2015.
”Isigqibo salo ntlanganiso sasigqithisela kumphathiswa uFikile Xasa nezinye ii-ofisi ezichaphazelekayo kwimicimbi yobukhosi eMzantsi Afrika, akayoKumkani yamaMpondo uZanozuko,” utshilo uStella.
Umbutho odibanisa zonke izindlu zasemaMpondweni Imbumba YamaMpondo, kudala ugushuza usenza iinzame zokumiselwa kwale Kumkani.
Usihlalo walo mbutho uMduduzi Sibulali uthi kudala bejikeleziswa ziintshaba zesizwe samaMpondo.
”IKumkani ayiyo karhulumente yeyesizwe, siyibeka ngokwesiko lamaMpondo le Kumkani kwaye asisajiki kwanto ngoku, sixolele ukuba sibanjwe ngobunjalo bethu apha, kudala bexoka aba bantu ngembali esiyaziyo,” uthethe watsho uSibulali.
Lo kaSibulali unqande uStella ngelithi bangaqalisi ukugrumba iimbovane ezizakubaxaka.
”Kaloku amaMpondo sithi, asidingi kuya kwenye indawo ukuze sazi ukuba ngubani iKumkani yethu, ikomishini kaNhlapho yayibaxelele, umongameli uZuma ngo2010 wayinika isiqinisekiso le Kumkani, asoze sime bayadlala,” utsho uSibulali.
Ngenxa yokukutsala-tsalana kwezi zindlu, inkosikazi kaMpondombini Sigcau, uLambekiso Sigcau, uzakuba esenkundleni ngomhla wamashumi amabini kwinyanga ezayo emva kokulahlwa sisibheno ebesifake kwinkundla ephakamileyo yezibheno eBloemfontein kunyaka ophelileyo.
”Nokuba kuyintoni sinqwenela uxolo nozinzo kwisizwe samaMpondo, asifuni kubona imilo edla ngokubakho exaka abantu xa iqalile apha, sicela inzolo kodwa inyani kukuba nguNzululwazi Sigcau iKumkani yamaMpondo,” ugadlele watsho uStella Sigcau.
Kulindeleke iKumkani eziquka eyamaXhosa, abaThembu kunye namaZulu kumcimbi wokumiselwa kwale Kumkani eSiphaqeni.
Amakhosi akrolonqwe ngenduku yiMamelodi Sundowns yathatha indebe!