UMZIMBA wepolisakazi, uWarrant Officer Nosipho Mphakathi (40), ubonwe udada kumlambo waseMzimvubu eSajonisi ngenjikalanga yangoMgqibelo emva kweentsuku ezine edukile.
Isithethi samapolisa aseMpuma Koloni, uColonel Sibongile Soci, uthi umzimba kaMphakathi ubonwe ngumnini wendawo yokwamkela iindwendwe (lodge) eSajonisi udada emlanjeni. Akukacaci ukuba yintoni unobangela wokubhubha kweli polisakazi. Amapolisa athi kuseza kwenziwa uqhaqho lomzimba.
UMphakathi uduke ngokuhlwa kwangoLwesibini, umhla wesibhozo kule nyanga. Ugqityelwe ukubonwa ngunyana wakhe oneminyaka elishumi elinesithandathu (16) eshiya ikhaya lakhe eliseTyibane eSajonisi.
UMkomishinala wamapolisa ephondo, uLieutenant General Liziwe Ntshinga, udlulise amazwi ovelwaneno kusapho, abahlobo kwanoogxa bakaWarrant Officer Mphakathi.
URonwen Williams ucelela inkxaso yabalandeli beChiefs nePirates!