Indibano ehlelelwe ukuxovula izibheno malunga nenkomfa yeANC ebibanjwe kwisithuba senyanga edlulileyo iyaqhuba kwihotele i-ICC eMonti, apho uMongameli Jacob Zuma negqiza lakhe bexakekile bezama ukusombulula iyantlukwano kumalungu eANC kweli phondo.
Le ndibano yekomiti esebenzayo kazwelonke yeANC (National Working Committee [NWC]) izokusombulula izibheno eziphakanyiswe ngamalungu eANC angaxolanga yindlela eyaqhutywa ngayo inkomfa yalo mbutho ephondweni apho kwathi kwabethwana ngezitulo, kwashiyeka konzakele abathunywa abaliqela.
Umlo owabangela lo qulukubhode wawuphakathi kwabaxhasi bakaOscar Mabuyane owaphumelela kwisikhundla sokuba nguSihlalo esohlula iNkulumbuso uPhumulo Masualle, obefuna isihlandlo sesithathu kwesi sikhundla.
UMasualle noMabuyane bayinxalenye nale ndibano yanamhlanje.
Kwindibano yase-ICC namhlanje (ngoMvulo) singabalula iinkokeli ezifana noZuma, Cyril Ramaphosa, Baleka Mbete, Gwede Mantashe, Jessie Duarte, Jackson Mthembu, Bheki Cele, Bathabile Dlamini, Collen Maine, Fikile Mbalula, Zizi Kodwa, Nathi Mthethwa, Nomvula Mokonyane, Mcebisi Skwatsha, Tina Joemat-Peterson, Edna Molewa, Derek Hanekom nabanye.
Kwisithuba semizuzu embalwa indibano iqalile, I’solezwe libone iinkokeli zeqela elingonwabanga yinkomfa yephondo liphuma kwindibano leyo. Eli qela beliquka uMlibo Qoboshiyane, Teris Ntutu noAndile Lungisa.
ULungisa uxelele I’solezwe ukuba akazukuthetha nto nanjengoko imvume inikwe uMantashe kuphela, logama uQoboshiyane engqinile kuphela ukuba bazondlalile izikhalazo malunga nenkomfa yephondo.
“Siwondlalile umcimbi, ngoku silindele kwiNWC,” utshilo uQoboshiyane.
Akwazeki ukuba iyakuqhuba de kube nini inkomfa le, kodwa kulindeleke ukuba igqitywe namhlanje.
‘MayingabingooNopopi ooCeba, mabasebenze ekuhlaleni njengoko bonyulelwe oko’