Sisathe chu kuhle ngokuncokola namagqiyazana azenzela udumo kwiqonga losasazo kuMzantsi Afrika.
Ingakumbi abo baphuma kwiphondo leMpuma Koloni, nabakhanyisa isibane seli phondo kumabonakude nonomathotholo.
USimphiwe Mbutuma-kaFreddie weliphepha-ndaba unqakule unondaba weendaba zesiXhosa kwijelo likamabonakude uSABC 1 uLISAKHANYA PEPE wamngcambazisa wenjenje:
SIM: Kanye-kanye ngubani waphi lo Lisakhanya Pepe?
LISA: Hahaha! Oh! ULisakhanya Pepe uzalelwe wakhulela kuNtselamanzi eDikeni. Ndizelwe kwiminyaka engamashumi amathathu eyadlulayo.
SIM: Ufunde phi, ukhuliswa ngubani kwikhaya elinjani?
LISA: Ngumhakhulu wam, utata kunye no-dabawo. Iminyaka eliqela ndiyichithe kwadabawo wam, ndifunda eLovedale Primary , ndayokuqala aphakamileyo eJabavu High eDikeni, ndade ndabe kanti ndiya eBhayi kumama wam ukuze ndigqibezele izifundo zamabanga aphakamileyo (uGrade 11 & 12) kwisikolo saseMasibambisane kwalapho eMambozana.
Ikhaya lona yayilikhaya elifudumeleyo, besibaninzi kwaye ngethuba besibancinane besidibana ngesitya somphokoqo esityeni esinye.Hahaha!
SIM: Udibana phi kengoku nosasazo? Ingaba yinto oyifundeleyo?
LISA:Ndaya kwiYunivesithi yaseWalter Sisulu eMonti, ndafaka isicelo sokwenza izifundo zokuntathela (Journalism) kuba kaloku ndandifuna ukubhala, kodwa ndathatyathwa kwizifundo zosasazo (Broadcasting) kuba yayizifundo endandizikhethile nazo.
Ndidibene nosasazo ngonyaka ka-2010, kwiminyaka emibini emva kokuqoshelisa izifundo zam, ndaqala ngokufunda iindaba kwisikhululo sasekuhlaleni iNkqubela FM eBhayi, nalapho ndandisenza nenkqubo-ndaba yesosikhululo (Current Affairs). Ekuyeni kuphela konyaka ka-2011 ndaqala ukusebenzela iBay TV apho ndaba ngumfundi weendaba wokuqala wesasikhululo.
SIM: Ubukhuthazwa kukujonga kubani ngelixesha lonke?
LISA: Ngabantu abafana no-Mam’uNoxolo Grootboom, uZodwa Nogilana kunye notat’ uFikile Lubisi.
SIM: Ukuba ubungafundi iindaba, ngowusenzani, phi?
LISA: Ngendingu Advocate Pepe.
SIM: Baziva njani ngawe kuNtsela nakokwenu kengoku?
LISA: Indawo endiphuma kuyo ndayenza yazingca. Ukuphuma kwindawo yakuNtselamanzi zange kucingwe ukuba igama lakhona lingakwindawo ebanzi ngenxa yegama lam. Ayilosapho lwam nje kuphela, kodwa noluntu lokuhlala jikelele.
SIM: Kokuphi ukutya okuthandayo?
LISA:Ndiyawuthanda kakhulu umphokoqo ngaphezulu kwento yonke..Hahaha!
SIM: Uzilungiselela njani iindaba ukuze ungabhudi?
LISA: Ndihlala ndiwutsala ezantsi umphefumlo kwaye ndiphole, kwaye ndiqinisekise ndifika ngexesha andidyuduzeli kwigumbi leendaba ukuze ndibe nokufunda kakuhle amabali wam.
SIM: Akhona amathuba wamanina kwicandelo leendaba xa ujongile kule mihla?
LISA: Anawo kakhulu Sim, qha uninzi lwethu asizithembanga ukuba singayenza lento, kule mihla abasetyhini bayanikwa amathuba.
SIM: Uzibona uphi kwiminyaka ezayo ingakumbi kweli khondo?
LISA: Ndingathanda ukukhula ngakumbi, mhlawumbi ndizibone ndisebenza phaya ngasemva kwiminyaka ezayo.
SIM: Nibangaphi kowenu?
LISA: Thiza! Asibaninzi Sim, ndinoodade abathathu kwicala likamama, babebathathu nomntakwe kwicala likatata, oko kwenza isixhenxe. Hahaha!
SIM: Xa ungekho matasa-tasa uzonwabisa njani?
LISA: Ndibukela imiboniso okanye ndiyokuthenga ukuba imali ikhona..LOL!
SIM: Uyakhonza?
LISA: Ewe, ndiyakhonza eNew Hope.
SIM: Wenza njani xa udakumbile?
LISA: Ndifowunela uDabs wam, siye sithandaze kunye ndigqibe ndidlale iCD yenkonzo.
SIM: Izicwangciso zomtshato nosapho?
LISA: Thiza! Hahaha! Ndicinga ukuba liphupha laye nawuphi na umntwana oyintombazana ukuzibona etshata. Kwaye ndingomnye wabo, ndifuna ukuba nabantwana ababini ndi-adopthe omnye ukuze babebathathu.
SIM: Khuthaza abo bafuna ukulandela ezinyaweni zakho?
LISA: Kholelwa kwiphupha lakho, eli lizwe lelethu makhosikazi kwaye nendawo ophuma kuyo ingabi ngumqobo emaphupheni akho.
SIM: Uthanda ntoni ngoMzantsi Afrika?
LISA: UMzantsi Afrika lilizwe elihle, kwaye ndithanda nokuba abasetyhini bayakwazi nokudlala imidlalo ibikade idlalwa ngamadoda. Siqhuba iimoto into engekhoyo kwamanye amazwe.
SIM: Ukhona kumakhasi wonxibelelwano?
LISA: Ewe, ndikhona kuFacebok.
Meta AI, wamkelekile kwikhaya lethu lesiXhosa!